Викторин митрополитлэн Христослэн Вордсконэныз ӟечкылан гожтэтэз

Ижкар-Удмурт митрополияысь Викторин митрополитлэн Ижкар но Сарапул епархиосысь священникъёсты, монахъёсты, мирын улӥсьёсты Христослэн Вордсконэныз ӟечкылан гожтэтэз

«Туж быдӟым, данолэсь но дано паймымон уж туннэ быдэсмиз: Нылмурт Нуны вае но пушкыз уг сӧриськы, Кыл лулмугор басьтэ но Атайлэсь уг люкиськы, Кылчинъёс пудо возьмасьёсын ӵош данъян гуръёс кырӟало, ми но соосын ӵош вазиськиськомы: дан Вылысь Инмарлы, музъем вылын каньыллык»
Христослэн Вордсконэзлы сӥзем службаысь стихира

Инмар Пилэн азьвыл ик тодытыса верам вордсконэз туннэ быдэсмиз шуыса, мон тӥледыз, Христослэсь яратоно нылпиоссэ, ӟечкыласько югыт-чылкыт праздникен — Христослэн Вордсконэныз. Та праздник вуыку пудо возьмась иудей пиос кадь, Персияысь визьнодчиос кадь быдӟым шумпотонэн тыр луыса, сюлэмдэс лӧпкытыса, Инмарлэсь адями луон быдӟым Тайназэ (ватӥськем лушкемлыксэ) кабыл басьтыны курисько, кудӥз кык сюрс ар талэсь азьвыл утиськон вайись югытэн Вифлеемысь пудо кӧлытон гидысен пиштыны кутскиз.

«Асьмелы пинал Пи вордӥськид, асьмелы Со сётӥськиз: табере асьме пӧлын Инмар!» — та нуналэ шумпотыса вазиське Христослэн Черкез.
Райысь уллям бере туж секыт но шимес вал сьӧлыкъёс пӧлы выем адямилэн азьпал улонэз, но туннэ дунневыл калык шумпотэ вашкала аръёсы тодытыса веранлэн быдэсмон дырыз вуиз, шуыса, уго Ачиз Кылдытӥсьмы, улонлэн Ошмесэз — Вылысь Инмар — адями луыса музъем вылэ васькиз Аслаз яратоно нылпиосызлы Инмысь Атаймы дорын ноку но бырисьтэм, шудо улон сётонэз берыктон понна. Вае вунэтоме алекъяськыса, йыркуръяськыса, кӧтӝожен улонэз, соосыз сисьмоно даурлэн ки улаз кельтоме, нош асьмелэсь сюлэммес Христослэн яратонэныз, зӥбыт-востэм улонэн тырмытоме. Инмарлэн дэлетэныз, осконлы шумпотонэн асьмеды дун-чылкыт кароме но Быдӟым Василий югдытӥсьлэсь та кылъёссэ санэ пономе:

«Озьыен, огазе кариськоме Инмысь Кузё-Инмарлэсь лыктонзэ шумпотыса возьмасьёсын. Тодад вай визьлыко пастырьёсты, — асьпалзэ тодытыса верась священникъёсты, шумптоӥсь кышномуртъёсты… — ваньзы соос пичи Нуны пыр Быдӟым Инмарлы йыбыртъязы, пичи шуыса ӧз учке, данъязы Солэсь Инмар луон быдӟымлыксэ. Уго Инмар Кужым адями мугор пыр пиштыса-югдыса улыны кутскиз; югдытӥз сюлэмзылэн синъёссы дун-чылкытэсь муртъёсты; таӵеос пӧлы асьмеос но мед сюромы вал», — Инмарлэн Адямилы паймытон амалэн пӧрмонэз сярысь вера Быдӟым Василий югдытӥсь.

Гажано атайёс, агай-вынъёс, сузэр-апайёс! Черкен кивалтӥсь архиерей луыса мон та дун-чылкыт праздник нуналъёсы Христос Инмарлы осконэз калык пӧлы нуыны курисько, уго та вакытэ дунне тужгес но пӧртэм визьсынаськонъёсын бугыръяське. Кызьы Персияысь визьнодчиос Христос Инмар Пилэсь вордсконзэ данъяса саламъёс вайизы, озьы ик асьмеос но Инмар Пилэн Вордсконэзлы сӥзьыса саламъёсмес-кузьымъёсмес ваёме, — со мед луоз ёрмыса, курадӟыса, ӝожлык пӧлын улӥсьёслы юрттэт, соослэсь сюлэмзэс буйгатон.

Тӥледлы, тӥляд семьяостылы, матысь муртъёстылы сӥзисько ӟеч тазалык, ёрмытэк-ӟудытэк, шудбуро, азинлыко улон, оскондэс кужмоятон, христиан осконлэсь бырисьтэм-кысӥсьтэм шумпотонзэ; Инмар тӥляд вань ужъёсады, улон-вылонады мед юрттоз, дэлетсэ-берекетсэ мед сётоз.

ВИКТОРИН

Ижкар-Удмурт епархиысь митрополит,
Сарапул епархиен огдырлы кивалтӥсь.
Ижкар,
Христослэн Вордсконэз,
2022 ар.